بن واتای چاوەڕوانیی سەرکەوتن و پێشبینیی داھاتووی ڕوون لە شێعری بەرگریی عەبدوڵا پەشێودا؛ لێکۆڵینەوەی دەفتەری دوازدە وانە بۆ مناڵان و چەند شێعرێکی قەدەغە

بن واتاکانی ئەدەبی بەرگریی بە گشتی و شێعری بەرگریی بە تایبەت جۆربەجۆرن. بن واتای چاوەڕوانیی سەرکەوتن و دەرکەوتنی داھاتووی ڕوون یەکێکە لەو بن واتایانەی کە لە شێعری شاعێرانی ئەم بوارەدا ڕەنگدانەوەیێکی بەرچاوی ھەیە. شوێنەواری ئەم بن واتایە چ لە ئەدەبی بەرگریی جیھانیی و چ لە ئەدەبی ناوچەیی و نیشتمانیی دا بەڕوونیی دیارە. ھەبوونی ئەدەبی بەرگریی بە چاوەڕوانیی سەرکەوتن بۆ بزاڤە بەرگریی کارەکان و داھاتوویێکی ڕوون بۆ نەتەوەکانیانەوە بەندە کە تەنیا دەتوانێت بە دەستی منداڵان، واتە بەرە و وەچەکانی داھاتوو ڕوو بدات. عەبدوڵا پەشێو وەکوو یەکێک لە کۆڵەکەکانی ئەدەبی بەرگریی ھەرێمی کوردستانی باشوور لە نیوەی دووھەمی سەدەی بیستەم دا، ھەوڵی داوە جێگای ئەم بابەتە لە دڵی شێعرەکانی خۆی دا بکاتەوە و کاریگەرییەکی باشتر و زۆرتر بە مەبەستە شێعرییەکانی خۆی ببەخشێت. لەم وتارەدا ھەوڵ دراوە بە توێژینەوە لە دەفتەری دوازدە وانە بۆ مناڵان و چەند شێعرێکی قەدەغەی پەشێو، و بە پشت بەستن بە شێوازی گێڕانەوەیی-شیکارییەوە، کاریگەریی قووڵی ئەم بن واتایە لە سەر مەبەستە شێعرییەکان و شێوازی شێعریی شاعێر لە ئەدەبە بەرگرییەکەی دا دەر بخات. ئەم لێکۆڵینەوەیە لە بەشێکی ئەنجامەکانی دا دەری دەخات یەکێک لە گرنگترین بن واتا شێعرییەکانی پەشێو چاوەڕوانیی سەرکەوتن و پێشبینیی دەرکەوتنی داھاتوویێکی ڕوونە کە بەرەی داھاتوو پێکی دێنێت. توانستی شاعێر لە ھەڵبژاردنی وشە ڕاگەیێنەرەکان و کەڵک وەرگرتن لە وێنەسەرەتاییە ناسراوەکان بووەتە ھۆی ئەوەی کە مۆرکێکی تایبەت بە شێوازەکەیەوە بنەخشێت و بەھێزتری بکات تاکوو کاریگەرییەکی قووڵتر لە سەر بەردەنگ دانێت